O‘zbekiston Respublikasi Hukumatining "Raqamli hukumat" tizimi tarkibida "OASIS" Yagona raqamli platformasini yaratishni nazarda tutuvchi qarori qabul qilindi.

Platforma 2026-yil 1-dekabrgacha ishlab chiqilishi va davlat axborot tizimlarini modernizatsiya qilish va integratsiyalashning asosiy vositasiga aylanishi kerak.

"OASIS" platformasini yaratish quyidagi maqsadlarga qaratilgan:

• davlat axborot tizimlarini ishlab chiqish va rivojlantirishga yagona texnologik yondashuvni ta’minlash;

• modulli texnologiyalarni joriy etish orqali ularni yaratish jarayonlarini optimallashtirish;

• davlat organlari axborot tizimlari faoliyatining moslashuvchanligi, xavfsizligi va samaradorligi darajasini oshirish.

Hujjatga ko‘ra, 2025-yil 1-noyabrdan boshlab IT-sohasini qo‘llab-quvvatlash bo‘yicha qo‘shimcha chora-tadbirlar nazarda tutiladi:

• Markaziy bankning "Raqamli startaplar" dasturi yoki "tartibga solish qumdoni"da ishtirok etuvchi startap-loyihalarga Raqamli ma’lumotlar platformasidan bir yilgacha muddatga bepul foydalanish imkoniyati beriladi;

• O‘zbekiston Respublikasining xorijdagi diplomatik vakolatxonalari orqali jismoniy shaxsning shaxsiy identifikatsiya raqamini olgan xorijiy mutaxassislar - IT-park rezidentlariga bank hisobvaraqlari va virtual bank kartalarini masofadan turib ochishga ruxsat beriladi.

Qarorning amalga oshirilishi mamlakatning raqamli infratuzilmasini yanada rivojlantirish, texnologik suverenitetni mustahkamlash va axborot texnologiyalari sohasida innovatsion faoliyat uchun qulay shart-sharoitlar yaratishga qaratilgan.